بعد مداولات قادتها كوندليزا رايس ( باسكال ) قرروا البنات قبول العرض المقدم لهم من

مديرة المدرسه بالدراسه عن طريق المنازل

وطبعا كان هذا العرض مقدم لهم في عرس دلال ومحمد اللي كان عرس مختلف جدا

وراقي ، حضرته الفنانه ديانا حداد والفنان علي الحجار والفنانه سميه الخشاب

واللاعب الكبير هادي خشبه < << ما ادري وش جابهم ذا العرس اللي كنه عيد العمال

ما علينا ولا عليكم

اهم شي ان العرس سار على احسن حال وطارت دلال مع محمد الى كندا

…

الاميره نوفه قررت في خلال هذي الاحداث بدء حياتها بطريقتها الخاصه

طريقة الاميرات …ثقل ومصلحه وبزنس وعلاقات

كلنا استغربنا بقائها بجانب والدتها خلال ملكة  ملاك و جعيفر حتى ان البعض قالوا

ان امها خايفه عليها لا تضيع في الزحمه ، والاسواء اللي قالت ان امها رابطتها من رجلها

في الطاوله عشان ما تتحرك

نترك الكلام لنوفه لتخبرنا الحقيقه عن ما حدث في ذلك اليوم

نوفه .. المايك معك ،، تفضلي طال عمرك

(( والله في الحقيقه والواقع اني ما كنت مربطه ولا شي ، بس هذي اشاعات المغرضين

و اعداء النجاح واللي على بالهم دمهم خفيف

انا كنت ارسم خطتي للمستقبل ، خصوصا بعد ما شفت ملاك طاحت هالطيحه القشرا مع جعيفر

اللي ما ادري وش لاقيه فيه

ناظرت الخشش والشوش اللي في العرس ، طبعا المتزوجات ، وطلعت في راسي فكره

اني اجمع معلومات عن العجايز اللي خششهم تسد النفس وباين عليهم اثار النعمه

اما الطفرانات فهذولي ما لقيت لهم بال

جات طاولتي انا والوالده في موقع استراتيجي قدرت اكشف منه كل الاحداث واشوف كل الشخصيات

وساعدتني وحده من الصبابات  بعد ما عطيتها وجه وضحكت لها و عطيتها غمزه

صدقت عمرها الخبله و سنترت فوق راسي ، ما ينزل شي من المطبخ الا اكون اول وحده تذوقه

قهوه شاهي حلا  معجنات خبز،،، شوي وتجيب لي القدر وتقول اغرفي

اهم شي انها ساعدتني في معرفة اسامي العجز الغنيات اللي حضروا العرس

والاهم من هذا كله اسامي ازواجهم الشياب < << فيس يرفع حواجبه

وخلال المده بين ملكة ملاك وعرس ودلال قدرت اجمع معلومات واسوي خطه قويه

عشان ابداء في تنفيذ مخططي في الزواج من شايب  غني ومنتهي

طبعا خطتي كانت  ادور شايب عنده فلوس  زوجته عجوز وشينه ، عشان يكون مل منها

ويكون في نفس الوقت عنده مساحه من الحريه عشان اقدر العب عليه

وبالفعل لقيت نفسي قدام مجموعه من الشياب اللي جو على حسب خطتي

والحمد لله ما احترت في الاختيار ، لقيت ابو سلطان شايب وعنده شركه عقاريه

في الرياض و لها فرع في دبي ، كان هو انسب واحد لخطتي

اول شي عمره كبير يعني حوالي 80 سنه

ثاني شي ما عنده الا ولد واحد  وهو اللي يدير الشركه في دبي ، وبنتين متزوجات

ثالث شي  ما يسافر الخارج كثير وهذا يعني انه ما شاف بنات واجد يقدرون يغرونه

و يخربونه علي و تفشل خطتي

رابع شي عنده شوية مشاكل صحيه في القلب ، بس يمشي الحال

وطبعا زوجته عجوز وما هنا وجه على كثر الميك اب اللي حطته والالماس اللي لبسته…

يوم اجتمعت عندي كل هالمعلومات ، بديت انفذ خطتي و كان اصعب شي

هو كيف اوصل له ؟؟؟

فكرت ارسل له ايميل ، بس قلت ما بيقتنع وبيفهم اني العب ومخططه عليه

فكرت اقدم على وظيفه  عنده في الشركه ، بس عرفت انهم ما يوظفون بنات

فكرت وفكرت وهم بعد فكرت الين بغى يطيح شعري من كثر الهرش

الين طلعت معي فكره خطيره ومجنووووووونه …..

.

ما هي خطة نوفه الخطيره؟؟؟

كيف ستنفذ خطتها ، وهي تقول انها خطيره؟؟؟

هل ستنجح خطتها في الايقاع بابو سلطان ؟؟؟

…

هذا ما ستعرفونه في الحلقة القادمة حين نستكمل بقية المقابلة

…..

في بيتنا العامر

اختي المهبوله : درايفر اخوي ، ابيك توديني لفيفا

انا : خير يا طير وش تبين في جيزان

اختي : ههه ، ماهي فيفا اللي في جيزان ، فيفا اللي في شارع الستين

انا : افا الاتحاد الدولي لكرة القدم الفيفا جابوه عندنا وانا اخر من يعلم

وبعدين وش عندك ، لايكون تبين تصيرين لاعبة كوره ، والا تشتكين عليهم

انهم ما حطوا لكم حصة  كرة  قطن  حريميه في المدرسة  ، هي انتي تبين تفشلينا

قدام اللي يسوى واللي ما يسوى ، هذي عادتنا وتقاليدنا ، والله لا افرشك ترى

اختي : يا درايفر ، ما خبرتك كذا ، انا ابغا اروح لفيفا  ….

هذي محلات تبيع طيور وسمك وحيوانات حلوه

انا : اها ، قصدك حديقة الحيوانات

اختي : لا مو هي ، بس محلات تبيع احياء لطيفة ، اما حديقة الحيوانات ما تبيع

وبعدين ما فيها الا ذاك الذيب اللي جاه  انيميا وبكره يجيه كساح من الجوع

والا فرس النهر اللي راقد في ذيك المويه اللي تحوم الكبد

انا : طيب عرفنا لاتقعدين تقصين علي كتاب العلوم حقكم ، وليش تبين اوديك؟؟

اختي : شوف يا اخوي ،، مو انا تعرفت على وحده تشاركني هوايتي

تذكرها ذيك البنت اللي قعدت تطنز علينا يوم كلمتني  ،

انا : ايه ذكرتها ، ام النمل

اختي : قصدك نوره ، ايه هذي هي ، ابي اشتري لها هديه من هناك

انا : هههههه ، وش بتشرين لها ، شفاط النمل ، ام النذاله ،،، قووووووويه

اختي : لا وبلاش طنازه لو سمحت

انا : طيب

اختي : انا كلمتهم قبل اسبوع ، وسألتهم عن النمل ، قالوا ما يجيبون الا بطلبيه خاصه

عاد انا قلت له بكره باكلمكم

رحت وجمعت الاشرطه الوثائقيه اللي عندي عن النمل ودخلت النت وبحثت عن أي شي

يخص النمل ، الين ما حصلت نمل شكله واااااااااو على قولة نوره

من جد نوع نادر ولا ينوجد الا في شجر ينبت في غابات الامازون ، ومأذيهم هناك

وحاطين عليه عرض خاص ، تشتري وحده تحصل على 20 مجانا بعيالهم وقرايبهم

واذا احد خاطب عندهم بعد يجيبونه

ارسلت لهم ايميل وردوا علي يبون ادفع لهم عن طريق فيزا او ماستر كارد

وخبرك انا ما معي لا هذي ولا ذيك ، رجعت اتصلت على فيفا وعلمتهم

قالوا خلاص احنا بنستورده وانتي تدفعين كل شي ، ولنا نسبه

انا وافقت ، عاد اليوم اتصلوا علي وقالوا استلمنا الطلبيه ناقصه نملتين ونمله مصابه

فابي منك توديني اتطمن على نملي وادفع لهم فلوسهم واروح اودي الهديه للبنت ،، وش قلت ؟؟؟

انا : والله يا بنت ما انتي بهينه ابد ، اتصالات ومفاوضات وعقود واتفاقيات

طيب وش رايك تصيرين مديرة اعمالي واعطيك راتبك نمل

اختي : يا الله عاد ، ابيك توديني ، ترى جد السالفه ، والبنت مواعدتها في الملاهي بكره

ابي اسويها لها مفاجأه

انا : اوكيه ، بس تعشيني على حسابك  فلافل من ماكدونالدز

اختي : هاااااه ، ليه ماكدونالدز صار يبيع فلافل ؟؟؟

انا : اما  ما تدرين ، ما شفتي عروضهم؟

اختي : اجل بعذرهم هارديز يوم يبيعون مطبق

انا : هذا وانا  اخوك يسمونه العولمه ، يعني بكره لاتستغربين اذا لقيتي لك  واحد

في بيتزا هت يسوي سندويتشات كبده ، لان اتجه السوق الحين يطلب كذا

اختي : وانت صادق يا اخوي ، لان الانسان بطبيعته يحب التغيير ويحب يلقى طلبه

في مكان واحد زي الهايبرماركت فيها كل شي، عشان كذا المطاعم لازم تسوي زيهم

يعني لو كنتاكي يفتح له قسم فول وعدس  ومحل تميس راح ينجح

انا : استغرب ليه ما خذوك في منتدى جده الاقتصادي  لان بصراحه عندك فكر اقتصادي

وخطط تنمويه قووووووويه

اختي : في منتدى اقتصادي في حراج بن قاسم عارضين يستضيفوني

اسمه منتدى دجه الاقتصادي ، وكل محاضره القيها بيعوطوني غساله مستعمله

انا : قومي البسي وخلينا نمشي ، ما انتي عاقله يا خريجة وول ستريت

.

والى اللقاء في الحلقة القادمة

 

 

ـــــــــــــــــــــــــــــــــــــــــــــــــــــــــ
التصنيفات : غير مصنف |   دوّن الإدراج