جمعة البنات

في بيت باسكال تجمعت شلة البنات المعتاده وبزيادة عضوتين توهم طازه

الاولى اكيد عرفتوها وهي ملاك والثانيه هي مفاجأة باسكال اللي وعدت

فيها البنات وتوها باقي ما وصلت

الموجودات حاليا في الجمعه

باسكال صاحبة الدعوه  ،دله العقل المدبر وملح الجلسه ، ليندا اخت باسم الدب

يا حليلها من زمان ما شفناها ، سوسن بطلتها الجديده

اختي ما هي معهم لانها بغت تسوي فيها و قفل عليها ابوي في غرفتها

الشيخه جايه تقول ابغا اصير اول امرأة تتسلق قمة برج  المملكه  ومجهزه العده

جايبه حبال ولوحه كبيره كاتبه فيها اسمها تقول بتعلقها فوق وسطل بويه

تقول بتكتب ذكريات في اعلى البرج

كان تخطيطها انها تطلع يوم الخميس في وقت الذروه عشان يصورونها وتشتهر

عاد ابوي قال معصي ما تروحين يوم الخميس لو قلتي الجمعه الصبح اقول ما يخالف

ما فيه زحمه والناس نايمه ويمديك تكتبين براحتك

الاخت اصرت على رايها مصدقه ان ابوي بيخليها تروح ، قفل عليها وخلها في غرفتها

و كان همها الوحيد الآن هو النمل اللي تربيه في الحوش

هذي البنت ما ادري من وين تجيها هالافكار ، احد يربي نمل ، لا ومن زود الهبال

مسميتهم وكل نوع مصلحه له مستعمره ، اللي حافرة له بالجدار واللي حاطه له رمل

واللي كاسره بلاط الحوش ومخليه بيته تحت ،، ما علينا

جمعة الشله كانت بدايتها تعارف على العضوه الجديده ملاك اللي باين انها بتاخذ

الجو الان خصوصا بعد ما انتشر خبر الموقف اللي سوته قدام الحريم

ولكن في نفس الوقت كان تفكير ملاك في الحب الملحوس اللي بلت نفسها فيه

طلبت من البنات التفكير في خطه لتسحيب جعيفر على وجهه

وبالفعل بدت الافكار  ، تجيها من كل صوب

في وسط الهذره واصوات الازعاج وكل وحده تبي تسبق الثانيه بالكلام

واصوات البيالات والمكسرات وطرقعة الاصابع وصوت التلفزيون واي شي فيه صوت

مرتفع تتخيلونه موجود الآن بينهم

في وسط هذه المعركه الصوتيه المزعجه دق جرس الباب اكثر من 10 مرات في دقيقه

قامت باسكال وهي تقول شكلها المفاجأه اللي قلت لكم  وصلت

سبحان الله انقطع الازعاج بدون مقدمات حتى اللي كان في حلقها كلام الدنيا كله سكتت

وعيونهم على الباب

باسكال : هلا والله وغلا ، هلا بالنور كله

نوفه : هلا بك انتي يا قلبي ، وش ذا يا اختي ساعه لين تفتحون الباب

باسكال : يا حبك للتهويل ، توك مالك دقيقه عند الباب ودقيتي الجرس 20 مره

نوفه : متحمسه يا اختي ، لا يكون فاتني شي

باسكال : لا تونا بدينا ، تفضلي حياك

ومسكتها من يدها واتجهت بها الى حيث تقف الان شلة البنات في انتظار وصول المفاجأه

باسكال : اعرفكم على  اخطر عضوه منظمه للشله ، نوفه

نوفه : عاد مو لهالدرجه ، صدق اني خطيره بس لا تخرعينهم

دله : هلا والله ، حياك ، معك اختك دله احلى قهوه وحلى تراه انا اللي مزينتها

ليندا : اهلين خيتو ، انا ليندا ، بدك زيت زيتون بوصي الماما تجيب لك ، ههههههه

ملاك : يا هلا والله ، انا ملاك وتراني جديده بعد مثلي مثلك

سوسن : هلا والله بالنور كله ، اعذريني يا قلبي ما اقدر اوقف

نوفه : الله يسلمكم جميع ، والله اني مدري وش اقول

باسكال : تفضلوا ارتاحوا وش فيكم واقفين

كل وحده من البنات تبي تاخذ نوفه جنبها الا انها اصرت انها تجلس بجنب سوسن

وقالت : باختصار ماني ماخذه مكان احد

وبدون مقدمات رجعت الهذره والقرقه وانواع الازعاج

بعده بدت الاسئله تطيح على راس نوفه من كل جهه ، حتى اللي تسأل سؤال

ما يمديها تسمع اجابته الا وهي سائله بعده عشره

دله : نوفه وين ساكنه ؟؟بحارتنا ؟؟ والا بعيد ؟

نوفه : لا ابد بالحاره اللي بجنبكم ، لكن مدري ليه احب حارتكم

باسكال : يمكن لاني فيها

نوفه : يمكن لانكم كلكم فيها > > >  الله من النصب

ليندا : شو بتعملي ؟ يعني بتدرسي والا موزززفه والا شو ؟

نوفه : طالبه بالجامعه ادعوا لي اتخرج وافتك

ملاك : ايه ربي يعينك ، انا متخرجه منذ مبطي ،

نوفه : طيب توظفتي والا لا

ملاك : لا ما ابي وظيفه ، ولا ابي شي

نوفه : هااااه ، اجل و ش تبين ؟؟؟

باسكال : ابي حبيب الروح ما ابي بديله ؟ هههههههههههههههه

ملاك : ايه والله هذا اللي انا ابيه ، لعب في مخي وهو ما يفهم

ذبحني يا ناس ، غبي الى درجة الجنون ،

تصوروا ارمي ليه باونتي عشان الطعم سيأخذك الى هناك ، قلت يمكن

ياخذه عندي جعل الله ياخذ عمره ، يروح ياخذه ويعطيه ابوه ويروحون يودونه الهيئه

يشوفون اذا فيه سحر والا

نوفه : ههههههههههههههههههههههههه ومن الحب ما سحر ، وش تحبين في واحد مثل هذا

دله : الحب اعمى ،

سوسن : الا اللي ما يشوف من الغربال اعمى

ملاك : ايه والله انك صادقه ، مدري وش اللي جاني ، خلوه يتقلع

دله : اقول فكونا ، غني لنا يا باسكال مشتاقه اسمع صوتك

باسكال : اغني و حلى الدنيا موجوده ، العين ما تعلى على الحاجب وكانت تأشر على نوفه

نوفه : وش دعوه عاد ، مو لها الدرجه

دله : اقول والله ما احد مغني الا انتي ، يا الله بلا تغلي عاد

نوفه : ما جبت شي معي

باسكال : موجود ، ابد غاليه والطلب رخيص ، ثواني اجيبه من غرفة اخوي

رجعت وفي يدها عود واعطته لنوفه اللي كان شكلها مستحيه لكن اصرار البنات و دهشة عيونهم

خلتها تقول لنفسها ، لازم اثبت لهم اني خطيره وبدت بالعزف بهدوء ، والبنات عيونهم عليها

واللي تهز راسها طربانه واللي مبققه عيونها تتابع يدينها وش لون تعزف واللي فاتحه فمها

والسعبوله شوي وتاصل الارض ، وحدها سوسن كانت حاطه يدها على خدها وتستمع بانصات

وبدت نوفه بعزف اول اغنيه

والله واحشني موت …. خاف بعدك اموت

قلبي لو من حديد.. ذاب وانته بعيد

لو خسرتك حبيبي .. شلون احب من جديد

وين القا وفا … او احس بدفا

ظلما بعدك حياتي .. كل شي فيها اختفى

روحي يمك حبيبي.. بايدك اتمنى اموت

.

وبالفعل كان للاغنيه وقع على جميع البنات اللي انسجموا معها و انطربوا لعزف نوفه

اللي كانت تنظر الى سوسن بطرف عينها دون ان تحس بها سوسن الغائبه في عالم غير العالم

وكأن حتى الصدف يجب ان تذكرها بشيء

استمرت نوفه بعزف الاغنيه دون ان تدري عن مدى تأثر سوسن الى ان غمزت لها باسكال

واشرت لها ان توقف الاغنيه ، وبالفعل اوقت نوفه العزف والبنات يصفقون بحراره

وبمجرد ان ضوعت العود انهالت عليها الاسئله

كيف تعلمتي ومن وين واللي تقول تكفين ابيك تعلميني

اخبرتهم نوفه انها تعلمت من قبل سنتين في اجازتهم اللي قضوها في احدى الدول العربيه

حيث كان في  نفس الشقق اللي سكنوا فيها يوجد معهد وتحايلت على اهلها انها تبي

تدخل كورس انجليزي واكتشفت ان عندهم قسم تعليم موسيقا

وبدون تفكير نسقت جدولها في المعهد بحيث تقدر تتعلم العود وتخلص الكورس بدون

ما يشعر احد بشي

دله : والله انها مفاجأه من العيار الثقيل

باسكال : ما قلت لكم انها خطيره ؟؟؟

ملاك : وربي ودي اقعد معكم واكمل الجلسه الحلوه واسمع نوفه

لكن هذي امي ارسلت لي تقول تعالي عندنا ضيوف

نوفه : تو الناس يا اختي  ما بعد تعرفنا عليك ولا سولفنا معك

ملاك : والله وش اسوي ، لو تدرين من اللي عندنا

دله : كني دريت ، ام جعيفر

ملاك : ايه خالتي ام جعيفر

دله : احلى خالتها ، بسرعه بسرعه لا تتأخرين على خالتك ام جعيفر

رجعت ملاك لبيتهم يسابقها شوقها و البنات كملوا جلستهم بقيادة نوفه التي انسجمت

مع العود لان لها فتره ما مسكت عود ، وباسكال تمول وتغني

اما دله فقد عزمت الامر في نفسها انها تشتري ربابه

.

والى اللقاء في الحلقة القادمه

 

 

 

ـــــــــــــــــــــــــــــــــــــــــــــــــــــــــ
التصنيفات : غير مصنف |   دوّن الإدراج