وا اسفاه على حالي اللي ما يسر عدو ولا صديق
الحين عيال عمي بيصيرون عندنا وبيغثني ولدهم ،لازم اخذه معي وين ما اروح
عاد هو مصلح فيها ابو البرستيج والفهم والثقافه
والنكبه الثانيه باقعد اصب لعمي قهوه كل شوي ، يا حبه للقهوه ، لو اسقي طعس
امتلا ما امتلا بطنه ، يا حبهم للسوالف هو و ولده
والطامه اختي اللي فرحانه وتبي تعرس ولا ودي اخرب فرحتها
بس ما هضمت ولد عمي يا ناس ، تكفون شوفوا لي حل
….
شكل هذا المشوار اخر مشوار لوحدي قبل وصول عمي وعياله
وصاني ابوي اروح لواحد في مطبخ عشان العشا ، واجيب معي اغراض طالبتها امي
يبي لها يوم كامل من اللف في الشوارع عشان اقدر اجيب نصها
خرجت من البيت وكانت الصدفه اني الاقي عيال عمي توهم واصلين عند الباب
بغيت اصد وانحاش بس ما امداني ، شافوني خلاص
رحبت فيهم وبدوا ينزلون من السياره
انا : الحمد لله على السلامه ، حياكم الله ، يا حيا الله من جانا
عمي : الله يسلمك ، هاه وين منحاش ؟ ههههههه < < مستخف دمك
زوجة عمي : ربي يسلمك يمه ، وش فيك ضعفان ؟؟ < < ما تدرين ان نصه منكم
ولد عمي ( العريس ) : الله يسلمك يا درايفر ، شكل عندك مشوار ، اجي معك < < من اولها
ولد عمي ( الدب ابو اذن ) هذا دب واذنينه كبار احسه مشروع فيل
عندكم سوني ؟
بنت متغطيه ومعها شغاله ، ما امداني اقز شي
انا : اقلطوا الله يحييكم ، تو ما نور المكان
طلع ابوي على صوت الترحيب الحار وكمل الباقي وبصوت مرتفع سمعوه كل اهل الحاره وضواحيها
وبعد ما دخلوا وانتشروا في البيت ، اللي في المجلس واللي داخل عند الحرمات
جا وقت القهوه
ابوي : انت ما رحت ؟ وش مقعدك ؟ ما احد يعتمد عليك في شي ؟ قم رح سو اللي قلت لك عليه
قلت في نفسي ، آآآه يا الذل من اولها وقدام ذولا بعد ، الله يصبرني
انا : خلني اصب القهوه ولاحقين ، بيمديني ان شاء الله
ابوي : الا قم الحين
ولد عمي : رح مشوارك وانا اصب القهوه والشاهي ، ما احد غريب
ابوي : كفو والله يا ولدي ، طول عمرك تعرف السنع < < يقصد ولد عمي
ظلمت الدنيا واسودت بوجهي والا من اول كان لونها رمادي ، ومشيت على غير هدى قاصدا
الشارع ، لو القا راعي مخدرات بهاللحظه حبيته < << ابوك يا المقطع الدرامي
…..
في غرفة سوسون
جلست سوسن تتابع فلم ( ذهب مع الريح ) ، كانت عيونها بس اللي تتابع
اما تفكيرها فكان في مكان بعيد ،
تنهدت تنهيده قويه وقالت : الله يسامحك !!!
ومدت يدها ورفعت دفتر خواطرها من الطاوله اللي قدامها وعدلت جلستها وبدت تكتب
…. ( م ح م د ،،، مستحيل ، حبك ، ملك ، دمي
غريبه هالقلوب ، لما تحب ، حتى وهي تشوف حبيبها ينسرق منها ما تمل
حتى وحبيبها ما يبيها ما تمل ، تعبت يا قلبي خلاص يكفي
حبيبك صار لغيرك ، ومن متى كان لك عشان تعذبني …. )
قطع حبل افكارها نور شاشة الجوال لان جوالها كان صامت
ناظرت الرقم ، (خالد صديق محمد ) وردت بصوت مبحوح
سوسن : هلا والله
خالد : السلام عليكم
سوسن : وعليكم السلام ، هلا خالد ، في شي ؟
خالد : لا الله يسلمك ما في شي ، بس والله ما ادري وش اقول لك
سوسن : قول ، وش فيك خوفتني ؟
خالد : ما عليه سوسن اتصلت عليك بدون اذن ، لكن احس اني ضايق صدري
وودي اتكلم معك في موضوع ، بس ما ادري انتي فاضيه والا مشغوله
سوسن : لا والله فاضيه وما عندي شي ، تفضل قول انا اسمعك ، ودي ارد لك
شي بسيط من الخدمه اللي قدمتها لي ، انت ما قصرت معي يا خالد
حتى وانت ما تعرفني ساعدتني وجبت لي الدوره في معهد الكمبيوتر
واي شي اقدر اقدمه لك انا حاضره
خالد : لا تقولين هالكلام ، انا ما سويت شي
سوسن : وش لون ما سويت ، وانا عندي خبر انك انت اللي متوسط عشان هالدوره
لا وبعد موصيهم علي ، والحين يبون يخلوني اشتغل عندهم
خالد : زين ، الحمد لله ، الله يوفقك انتي تستاهلين كل خير
سوسن : طيب قول وش فيك متردد ؟ شوقتني اعرف السالفه
خالد : الصدق اني ما ادري من وين ابدا لكن باحاول اقرب الموضوع يمكن تنفتح السالفه
